Menya impamvu ibipimo bishobora kwerekana ko umugabo ’atwite’

0
193

Ubushakashatsi bugaragaza ko bishoboka ko umugabo yakoresha igipimo gifasha abagore kumenya niba barasamye, kikamuha igisubizo ko atwite, nyamara byahe byo kajya

Gusa ibyo bisubizo ntibiba bisobanuye ko atwite koko, ahubwo biba bisobanuye ko arwaye kanseri y’udusabo.

Ibi biterwa n’uko umugabo cyangwa umusore urwaye kanseri cyangwa ikibyimba mu dusabo, bitera ukwiyongera k’umusemburo wa Human Chorionic Gonadotrophin (hCG) ubundi wiyongera iyo umugore atwite.

Ukwiyongera k’uwo musemburo kunagaragarira mu nkari yihagarika, ku buryo hafashwe igipimo cyo gutwita, uwo mugabo cyangwa umusore ibipimo bigaragara nk’aho yasamye.

Ikigo cyo muri Leta Zunze Ubumwe za Amerika cyita ku barwaye kanseri, American Cancer Society, muri 2021 cyagaragaje ko n’ubwo iyi kanseri idakunze kugaragara cyane, ariko nibura umugabo umwe mu 250, ni ukuvuga 0.4% aba azarwara iyi kanseri mu buzima bwe.

Urubuga Healthline rugaragaza ko kwifashisha ibipimo byereka abagore niba batwite bigakoreshwa mu gupima kanseri y’udusabo ku bagabo atari ibya vuba, kuko ubu buryo bwatangiye kwifashishwa mu myaka ya 1980.

Gusa uru rubuga rugaragaza ko atari byiza kumva ko wakoresha ubu buryo ngo bibe byaguha icyizere cy’uko utarwaye kanseri y’udusabo, kuko hari igihe ibi bipimo bishobora kukwereka ko utayirwaye kandi uyirwaye.

Runagaragaza ko atari buri gihe umugabo cyangwa umusore uyirwaye agira ukwiyongera k’umusemburo wa hCG, bityo ko bidahagije kwizera ibipimo weretswe n’ako gakoresho kifashishwa mu gupima ko abagore batwite, ahubwo ko wakwisuzumisha kwa muganga.

LEAVE A REPLY

Please enter your comment!
Please enter your name here